मकवानपुर । बागमती प्रदेशका मुख्यमन्त्री इन्द्रबहादुर बानियाँले आफूले समावेशी मन्त्रीमण्डल विस्तार गरेको दावी गरेका छन् । आज मात्रै कांग्रेसबाट पाँच मन्त्रीलाई नियुक्त गरी बागमती सरकारलाई पूर्णता दिएका बानियाँले आफूले मन्त्रीमण्डल विस्तारमा महिला सहभागितालाई जोड दिएको र सबै समुदायलाई समेटेर समावेशी मन्त्री मण्डल गठन गरेको बताए । उनले दलभित्र एकता कायम रहेको र कुनै प्रकारको विवाद नरहेको उल्लेख गरेका छन् । “कांग्रेस बागमतीमा विवाद छैन ।
कांग्रेस फरक–फरक विचार राख्ने तर एउटै पक्षमा उभिने पार्टी हो। विचार फरक हुन सक्छ, नेतृत्वको शैली फरक हुन सक्छ, तर कांग्रेसभित्र विवाद हुँदैन। पार्टी सभापतिले गरेका निर्णय सबैले ‘नो अब्जेक्सन’सहित स्वीकार गर्नुपर्छ ” । उनले भने । “म बागमती प्रदेश सभाको ३७ सदस्यीय दलको नेता हुँ, सबैको अभिभावक हुँ । ” दुई महिला, नेवार, तामाङ, बाहुन–क्षेत्री सबै समुदायलाई समेटेर मन्त्रिमण्डल विस्तार गरेको छु। आलोपालो गर्दै नेतृत्वमा पुग्ने सबैको समय आउनेछ ।
यसमा आत्तिनु पर्ने छैन । ” यसअघि बानियाँले आज शुक्रबार आफुले नियुक्त गरेको पाँच मन्त्रीलाई पद तथा गोपनीयताको शपथ ग्रहण गराएका छन् । उनले नेपाली कांग्रेसबाट पाँच जनालाई मन्त्री नियुक्त गर्दै आफनो नेतृत्वको मन्त्रिपरिषद्लाई पूर्णता दिएका हुन् । नवनियुक्त पाँच मन्त्रीलाई प्रदेश प्रमुख दीपकप्रसाद देवकोटाले पद तथा गोपनीयताको शपथ गराएका हुन् ।
मुख्यमन्त्री बानियाँले नियुक्त गरेका युवा तथा खेलकुद मन्त्री उर्मिला नेपाल, सामाजिक विकास मन्त्री कन्चनचन्द्र वादे, संस्कृति तथा पर्यटन मन्त्री सुरेश श्रेष्ठ, सहकारी तथा गरिबी निवारण मन्त्री विनु रायमाझी र आर्थिक मामिला तथा योजना मन्त्री प्रभात तामाङले पद तथा गोपनीयताको शपथ ग्रहण गरेका हुन् ।
मुख्यमन्त्री बानियाँले विना विभागीय मन्त्री शिवराज अधिकारीको समेत जिम्मेवारी तोकेका छन् । अधिकारीले आन्तरिक मामिला तथा कानुन मन्त्रालयको जिम्मेवारी पाएका छन् ।
