हेटौंडा:हेटौंडा उपमहानगरपालिका–९ स्थित मास्टर चोक अहिले तस्करीका सामानहरूको ‘खुला बजार’ जस्तो बन्दै गएको छ। रातमाटे नाका लगायतका सीमावर्ती क्षेत्रहरूबाट छली गरिएका चामल, चिनी, रेडबुल, लत्ताकपडा र इलेक्ट्रोनिक सामानहरू मास्टर चोकमा दिनहुँ खुलेआम झारिने गरेको पाइएको छ।
स्थानीय बासिन्दाका अनुसार दैनिक बिहान र बेलुकी भारतबाट ल्याइएका अवैध सामग्रीहरू साना ट्रक, टाटा मोबाइल, मोटरसाइकल तथा पैदलमार्गमार्फत चोकसम्म ल्याइन्छ र यहींबाट बिक्री तथा वितरण गरिन्छ।
प्रहरी र निकायहरूको मौनता आश्चर्यजनक
यस्तो खुलेआम तस्करी भइरहँदा पनि प्रहरी प्रशासन, भन्सार कार्यालय र खाद्य गुण नियन्त्रण कार्यालय भने मौन बसेको देखिन्छ। “मास्टर चोक त अब तस्करीको खुला गोदाम जस्तो भइसक्यो,” एक स्थानीय युवा बताउँछन्, “तर सुरक्षाकर्मीहरू चाहिँ बाटो हेरिरहेका हुन्छन्, केही गर्ने सक्दैनन्, या गर्न चाहँदैनन्।”
व्यापारीहरू दबाबमा, बजार अस्वस्थ
हेटौंडाका कानुनी व्यापार व्यवसाय गर्ने व्यापारीहरू यस्ता अवैध सामानहरूका कारण मारमा परेका छन्। कर तिरेर बेचिएको सामानभन्दा छलीको सामान सस्तोमा उपलब्ध हुने भएकाले बजारमा मूल्य प्रतिस्पर्धा अस्वस्थ बन्दै गएको छ।
स्थानीय माग: तत्काल कारबाही गर
नागरिक समाज, युवा संगठन र उपभोक्ता अधिकारकर्मीहरूले हेटौंडा–९ को मास्टर चोकमा भइरहेको यो सुनियोजित तस्करीमाथि तत्काल रोक लगाउन जिल्ला प्रशासन र गृहमन्त्रालयसँग माग गरेका छन्।
यदि राज्यले यस्ता नाकाहरूलाई नियन्त्रित गर्न सकेन भने, मुलुकको आर्थिक सुरक्षासँगै उपभोक्ताको स्वास्थ्य पनि धरापमा पर्ने निश्चित छ।